Хятадууд Хөөмийг Юнескогийн дэлхийн соёлын өвд бүртгүүлснээс хойш монгол дээлээ алдчих вий гэх айдас монголчуудын дунд төрөх болсон. Тиймээс уншигч, сэтгүүлч, мэргэжилтнүүд хамтран “Дээлтэй Монгол” хөдөлгөөнийг байгуулж, энэ талаар хэвлэл мэдээллийн хэрэгслээр нийтлэл нэвтрүүлэг бэлтгэн цацаж, өв соёлоо хадгалж, хамгаалж үлдэх талаар төр олон нийтийн анхаарлыг хандуулж чадсан билээ. Энэ дуулианаар Юнескогийн Монголын үндэсний комиссоос Монгол дээлээ Дэлхийн өвийн хороонд бүртгүүлэхэд холбогдох бүхий л судалгааны ажлыг хийх хүсэлтийг “Монгол костьюмс” ХХК-д тавьсан байна.

Тус компани нь дээл гэдэг утгаар нь бус Монгол хувцсыг хийх аргачлал, технологиор нь Дэлхийн соёлын өвд бүртгүүлэхээр судалгааныхаа ажлыг хийж эхлээд байгаа аж. Энэ оны зургадугаар сар хүртэл тус компани Монгол хувцасны урлалын талаар мэдээлэл, баримтаа бэлэн болгож Юнескогийн Дэлхийн өвийн хороонд хандах нь ээ. "Дээлтэй Монгол" хөдөлгөөний залуусын хүчин чармайлтаар бий болсон нийгэм дэх өв соёлоороо бахархах давалгаагаар сүүлийн өдрүүдэд үндэсний хувцас үйлдвэрлэгчдийн захиалга илт өсжээ. Өмнөх жилүүдийн цагаан сараар ахмад настнууд голцуу дээл хийлгэн өмсдөг байсан бол энэ жил залуучууд, хүүхдүүдийн хувцасны захиалга маш ихээр өссөн байна.

Мөн түрүүчийн жилүүдэд монголчууд элдэв чамин загвар бүхий дээл хэлбэрийн хувцас хийлгэх захиалга ихээр өгдөг байсан бол энэ жил жинхэнэ монгол үндэсний дээлний захиалгыг өргөн өгч байгаа гэнэ. Мөн луу, барын хээтэй торгоноос татгалзсан монголчуудын эрэлтээр бөс бараа нийлүүлэгчид усан, үүлэн, алхан, цэцгэн гэх мэт гүн билэгдэл бүхий зөөлөн хээтэй торгыг өргөн оруулж ирсээр байгаа аж. "Дээлтэй Монгол"-ын үйл ажиллагааг ийнхүү түмэн олон дэмжиж, дор дороо үндэснийхээ өв соёлоор бахархах эрмэлзлэлийг сэтгэл зүрхэндээ бий болгож байгаа нь талархууштай.

http://www.deelteimongol.com